«Кең болсаң, кем болмайсың!» - Қайырымдылық жобасы

27.11.2024

«СНПС-Ақтөбемұнайгаз» АҚ «Халықаралық «Қазақ тілі» қоғамы» бастауыш ұйымының 2024 жылға арналған жұмыс жоспарына сәйкес, ағымдағы жылдың қазан айында «Кең болсаң, кем болмайсың!» атты қайырымдылық шарасы өткізілді.

Жоба мақсаты - Ақтөбе қаласындағы ерекше білім беруді қажет ететін балалар оқитын арнайы мектептерге қайырымдылық көрсету.

"СНПС-Ақтөбемұнайгаз" АҚ Қауіпсіздікті үйлестіру жөніндегі бас инспекторы - "СНПС-Ақтөбемұнайгаз" АҚ Халықаралық "Қазақ тілі" қоғамы бастауыш ұйымының төрағасы Сақтағанов Абай Дидарұлы "СНПС-Ақтөбемұнайгаз" АҚ Халықаралық "Қазақ тілі" қоғамының жұмыс жоспарына сәйкес, қайырымдылық жобасы аясында Ақтөбе қаласындағы ерекше білім беруді қажет ететін балалар оқитын арнайы мектептерге, атап айтқанда:

1. Ақтөбе облыстық арнайы мектеп – интернат – колледж кешені КММ

2. Ақтөбе облысы білім басқармасының "№7 арнайы (түзету) мектебі" КММ

3. «Қалалық психологиялық-медициналық–педагогикалық консультация» (Қалалық ПМПК ) сияқты ірі мектептерге ақша бөлгізіп, мектептерге қажетті жабдықтар алып беруде ерекше үлесін қосты.

Абай Дидарұлы өзінің Компаниядағы маңызды қызметімен қатар «AMАNAT» партиясынан сайланған Ақтөбе қалалық мәслихатының депутаты ретінде көптеген мәселелерді көтеріп, мұндай игі істердің алдағы уақытта да жалғасын табуға бар күшін салатынын атады.

Ақтөбе облысы білім басқармасының "№7 арнайы (түзету) мектебі" КММ 1974 жылы интеллектісі бұзылған балалар үшін ашылды. Қазіргі уақытта мектепте 1-9 сыныптар аралығында 284 бала оқиды, оның 272-сі мүгедектік тобы бар бала. Білім алушылар арнайы оқу бағдарламасы бойынша білім алуда. Мектеп оқушылары «Таланттар шеруі» атты мерекелік шара өткізді. Шарада балалар өнер көрсетіп, көрермендерге өте жақсы көңіл күй сыйлады.

"СНПС-Ақтөбемұнайгаз" АҚ Әкімшілік департаменті Тіл саясаты және аудармалар бөлімінің бастығы Тұрғанбаева К.Қ. балаларға олардың ең керемет, өнерлі, талантты, ақылды екенін атап, өз алғысын білдірді. Балалар жақсы сөздерден күш алып, көздері бал-бұл жайнады.

Ақтөбе облысы білім басқармасының "№7 арнайы (түзету) мектебі" КММ-ге "СНПС-Ақтөбемұнайгаз" АҚ Халықаралық "Қазақ тілі" қоғамы атынан қайырымдылық көмек ретінде бір адамдық парталар орындығымен (12 дана) сыйға берілді.

Ерекше білім беруді қажет ететін балаларға арналған келесі мекеме - Қалалық психологиялық-медициналық-педагогикалық консультация (ПМПК). Бұл балаларды тексеруді және оларға консультация беруді, ерекше білім беру қажеттіліктерін және білім алу үшін арнаулы жағдайларды бағалауды, білім беру бағдарламасын айқындауды жүзеге асыратын, сондай-ақ мүмкіндігі шектеулі балаларды арнаулы психологиялық-педагогикалық қолдауға жіберетін білім беру ұйымы болып табылады.

«Қалалық психологиялық-медициналық–педагогикалық консультация» жанында 2007 жылдан бастап қысқа мерзімді диагностикалық 3 топ жұмыс жасайды:

1. Тірек-қимыл аппараты бұзылған топ

2. Көруі бұзылған балалар тобы

3. Кохлеарлы имплантты балалар тобы

Балалар кішкентай жаста болса да өздерінің жас ерекшелігіне сай дайындалған «Алтын күз» мерекесін өткізді. Олар тәрбиешілердің көмегімен өлең оқып, би билеп, өнер көрсетті. "СНПС-Ақтөбемұнайгаз" АҚ Халықаралық "Қазақ тілі" қоғамы атынан қайырымдылық көмек ретінде балаларға арналған дамытушы ойыншықтарға Сертификат табыс етілді.

Ақтөбе қаласындағы ерекше білім беруді қажет ететін балаларға арналған ірі мектептердің бірі - Ақтөбе облыстық арнайы мектеп – интернат – колледж кешені КММ. Қазіргі таңда мекемеде 133 ерекше білім беру қажеттілігі бар бала тәрбиеленуде. Мектепте есту қабілеті бұзылған 94 бала, көру қабілеті бұзылған 39 бала білім алады. Оқушылар арнайы оқу бағдарламасымен оқытылады. Мектептегі іс-шаралар жоспарына сәйкес, балалар Республика күніне орай мерекелік патриоттық әдеби – сазды кеш өткізіп, өз өнерлерін ортаға салды.

"СНПС-Ақтөбемұнайгаз" АҚ Халықаралық "Қазақ тілі" қоғамы атынан қайырымдылық көмек ретінде Ақтөбе облыстық арнайы мектеп–интернат–колледж кешені КММ білім алатын балаларға жылжымалы интерактивті тақта сыйға берілді.